東京出差 Day 9（一）

　　可能尋日真係好乖，主要都係留o係室內（有暖氣），休息得夠又不斷飲水，所以病情有好轉；雖然都係不斷流鼻水同咳，但已經無發燒症狀，亦都無乜喉痛。所以返工只係帶口罩，仍然如常工作學習。
　　不過真係大頭蝦，今朝唔記得帶暫時職員証，入唔到樓；去到入口打內線講低聲會遲到，然後返酒店攞卡。好彩酒店夠近，來回都只係25min，所以9:15就返到去。
　　今朝跟企劃部既同事學credit management，其實佢地都唔算係middle office（我唔肯定係咪front office），所謂風險管理，其實只係逢credit management system有warning時就通知相關人士，有新account時就做登記（同埋教人點樣計申請額）etc，至於批核配額就由另一個專責部門處理。兩位女同事都好友善，晏晝就同星期五差唔多，成班女同事一齊去飯堂食lunch，今次又要登記（星期五明明唔駛就入到）。原來日本人興食湯飯（每日四款，分別係中菜+白飯、日式飯／湯飯、日式烏冬／麵、中式拉麵），淨係病人先會食白粥，唔怪得我無見過粥舖啦！
　　下晝繼續做ISDA，做實習case學野入腦快好多，如果淨係跟住本user guide講，肯定教學雙方都悶死；而家佢淨係俾個case我，然後我唔識先問，一黎唔太阻住佢做野，二黎我要自已諗（所以會記得），一舉兩得。
　　放工約左同中大人類學師姐（日本人，住東京隔離個縣，咁o岩今日黎東京有一個鐘左右空檔），因為時間無多，就係公司樓下飲野。好耐無見，佢讀完master之後做左3年野，然後又重返校園讀人讀學phd，研究印尼既面具劇。日本讀phd唔似香港人人有studentship，似乎好少人有，所以真係要下定決心食穀種先可以報名（而且揹住個非商業既博士銜，就算畢業之後都好難搵工），令人佩服。
　　飲野時食左份warabi mochi（終於食到好味既mochi），斷估飯量唔細，但都係肚空空咁…唔知其他人有無咁既感覺，我上次黎日本超過一星期之後，就會覺得食極都肚空空，明明個set點睇都唔細，食完都係好快餓（斷估因為無油又無肉，淨係得澱粉質？），所以返到酒店坐一陣之後都係要出去食野，食左半份咖哩飯（一食落肚就覺得極飽，可能係終於有油？），但到而家只係10pm左右，我已經覺得個肚怪怪咁…話餓又唔係，話飽又唔係…唉，真唔慣日本既飲食。
　　希望聽日會再好返D啦；咁流鼻水法，天氣又乾燥，肯定好快就流埋鼻血…