東京出差 Day 8 (日)

　　半夜醒左幾次飲水，成晚都發冷發熱訓唔好，今朝訓到11點先起身。

　　酒店早餐就算假期都只係去到10點，所以梳洗完之後就出去車站附近搵食。病左想食得清淡D，但又唔知邊度有粥食（話時話，係東京行黎行去咁耐都無見過粥舖），決定食壽司。明明記得酒店同東京站中間有壽司舖，點知想搵時就會搵唔到，搞到成12:30咁滯先去到東京站食街既一間有壽司既舖頭，食左個lunch set。好彩不愧為東京站食肆，好快手，轉眼就有得食。沙律+5件壽司+一小碗刺身飯+湯=1500yen，唔算貴，但唔算好食（當然比一般香港舖頭好好多；但唔及我好鍾意既一間中價壽司舖）。

　　食完已經夠鐘上車出發去西國分寺。燧san完全無變，我一眼就認到；佢踩單車黎，但就要推單車陪我行。佢住係離車站15min左右既mansion度，停車場除左有三層車（係三層車，而唔係三層樓停車），仲有兩層單車！入到屋，歲半大既女女Mana一見到我就喊，搞到佢兩夫婦都無計。傾下飲茶食蛋糕，燧san又帶我參觀佢間屋（我對日本人普通住家有興趣，以前去住homestay既全部都係住獨立屋既有錢人／鄉下地方既比較富裕人士）。原來日本mansion都唔細，三房兩廳，應該過千尺，似乎賣緊3500萬円，比香港平，但可能係因為離東京市中心達（成粒鐘JR），所以先會平D?

　　燧san見我一場黎到，整mochi（糯米食品，類似年糕）俾我食，日本麵包機好似我地飯煲咁普及，而佢個麵包機又可以整mochi，所以就整黎食。由米到糕都只係要一粒鐘，日本電器真厲害。可惜整得太硬同埋太大粒，所以唔係咁好食（仲好飽添，好似食左兩粒無餡、唔甜又實既糯米糍）。

　　坐到5點左右，係時候準備Mana既晚餐，我亦都走啦；途經東京站大丸買左盒沙律返酒店食。見精神唔錯，出左去睇一幕見席既歌舞妓。感覺有D似睇大戲，但無咁熱鬧（演員一共只有5個），音樂又清；咁o岩呢幕完全無歌舞，我又聽唔明，所以好悶。唔會再睇啦！

　　今晚都係要早D訓，希望聽日會再好D啦！