東京出差 Day 12（四）

　　今日係最後一次全日返工（聽日下晝飛機），上晝學compliance。其實都無咩好學，因為理論上都係我地已經做緊既野（否則就係違規啦），好彩同我每個月俾香港compliace dept催眠既內容唔同，否則肯定想死。

　　中午食炸豬扒定食。日本出街食飯麻煩在要預先決定食咩，因為一間舖只有一種野食，炸豬扒餐廳絕對唔會有拉麵。日本炸野真係有一手，非常鬆脆！而且講時講，我兩星期返工咁多日，好似淨係自己俾過一餐午飯錢。

　　食完飯我地去附近一間百貨公司買朱古力。日本同香港相反，情人節由女仔送朱古力俾男仔，而且仲分「本命」（真命天子）同「義理」（所有男同事），等到三月既white day就由男仔送返俾女仔，非常公平。香港女仔淨係收禮物，真幸福。

　　下晝做左一陣ISDA練習，然後就講返下常見問題，香港既所有case list等。原來一向香港RM以為企劃部批得就即係okay係一場誤會，東京企劃部根本唔會（亦無權）判斷到底應唔應該讓步，只會講如果讓步就會有咩咩風險；決定申唔申請既係RM，批唔批就由Credit Dept決定。我返到香港要同班RM講清楚先得，唔係以後有咩發生搵我算賬就不得了（因為部份風險評估工作由東京轉移俾我做）！

　　夜晚無咩野想做；況且唔覺唔覺已經洗淨好少錢，破產啦！要留返D錢聽日搭車同埋買手信，所以都係唔好四圍去，食完晚飯就返酒店。今晚又係食壽司，吉野鮨本店，食左個定食（2100yen），好味，可惜八件壽司唔係全部我都鍾意食（日本既三文魚子okay，但魷魚我點都係麻麻地）。

　　返到酒店發現原來酒店既機場巴士，12:15之後班車竟然係14:15，車程85min，而我班機飛16:20。天！即係無車！唯有去搭JR…要拉住個行李行上行落，真麻煩！