東京出差 Day 11（三）

　　日本建國紀念日（傳說神武天皇於公元前660年2月11日即位）放假，所以我又有多一日去玩。尋晚去睇過Hato Bus（觀光巴士）有咩節目，可惜唔係行程唔o岩就係太貴，所以放棄。

　　結果今朝9:00先起身，酒店食埋早餐先出發去四圍行。首先去皇居附近，由酒店行去二重橋都唔駛半個鐘，仲撞到有政黨拉旗叫愛國敬天皇、天皇萬歲之類既口號添！咁橋皇居附近今日有區域競賽（似乎係接力跑），好多好多人參加，男女老少，天寒地凍都咁多人肯出黎做運動，真厲害。

　　之後去靖國神社，途中見到有人派傳單收集簽名。日本人好認真，簽名要寫清楚姓名，仲要留埋地址，唔似香港既政黨號稱收集到N個鬼畫符！其實所謂去靖國神社，只係去神社庭院，通常非家屬無得入內參拜（除非你係政要）。我既目的地係神社隔離個「遊就館」；記得上次去好似幾多野睇。

　　可能我讀人類學，又受後現代影響甚深，從未試過盲目愛國。所以唔介意日本人用自己既立場同角度出發去描述兩次世界大戰。其實「歷史事實」從來就係一個任由政權用對自己有利的方法編寫；所以近代史家認為每一個時代都要重寫一次歷史；亦都唔再流行「重塑歷史」，而只係希望利用歷史既某一部份黎「以古鑑今」。如果你都抱住中立心態，參觀完遊就館，可能都會認同日本攻打中國係自然趨勢；逆地而處的話，可能你都會咁選擇。
　　反思中國真係落後。與其毫無數據就咁亂叫「南京大奢殺」，不如花精力心血去搜集相片、做詳圖、畫簡表，博物館的數據比口號有力得多。人地個narrative咁完善，而中國除左大呼小叫就咩都無，叫日本年青人點會知道所謂「事實」？（其實係另一立場睇既事實，遊就館講既都全部係事實，無一句大話架）
　　而且我個人覺得，日本人對「事實」的認知比中國人更深入。中國歷史教科書太著重描述自己的慘痛，反而無乜寫當時世界大勢就係瓜分中國，歐美只係鞭長莫及、有心無力。
　　我一直都唔明，點解大家覺得「香港淪陷三年零八個月」，無人會話「香港淪陷一百年」？可見英國殖民教育成功培養出一代精英；我猜如果日本殖民教育亦持續上百年的話，香港應讓從來沒有淪陷吧！

　　行完靖國神社已三時許，沒有時間再去橫濱；所以去了日本橋，亦逛了一些手信舖。円太貴，沒什麼意欲買東西，只選了少量和菓子及兩個Hinamatsuri（女孩節）才有的飾物送給即將結婚的兩對朋友。

　　昨晚太飽，早餐又晏，所以沒有吃中午飯；但奇怪的竟是完全不餓，晚上亦沒有什麼想吃，所以買了個「最中」（威化皮包紅豆）及一些刺身回酒店便算。