東京出差 Day 10（二）

　　今朝上晝學ISDA對interbank風險管理的其中一個主要方法CSA。其實成個工作流程都好簡單，而且有個寫得好好既excel macro program，所以大家只係入兩行data就咩都自己出晒黎，實務上無咩特別難；原理亦只係ISDA既一部份，唔算深。不過我隱約覺得如果一個人淨係集中睇自己既工作，好易就會無限放大自己既重要性，明明好簡單都會覺得好複雜。

　　中午又係一班女仔去飯堂食，食左件炸芋頭、栗子紅米飯（飯堂會食到好飽，但唔會好食），不過又係要同一個人請我食，真唔好意思（因為我無職員証俾錢，而佢又唔肯收返錢）。

　　下晝如常做ISDA，仲收到隻招財貓禮物！今日有個次長掉去第二個部門，放工時所有人都企起身聽佢講返幾句，我反應太遲，到我發現，我企又唔係，繼續坐又唔係…結果扮唔知，繼續坐，點知佢講鬼咁耐，早知遲反應好過無反應啦！　　未病好，行一陣街都有少少頭痛，所以去地下街食壽司。東京元氣壽司，應該同香港係同一間，日本好味好多，又平，我唔覺唔覺竟然一個人食左七碟（2000yen），飽到不得了。

　　返酒店途中經過書局仲幫人買左兩本書。