倒數7天（星期四）

可能我遞信的態度堅決，老闆知道留我無望，第二日一早就俾封email我，叫我盡快做埋個account file，寫個list話俾下一任知道admin要做乜。呢封信令我鬆一口氣，因為我同老闆丈夫比較熟，如果真係由佢出面，我未必應付得黎。

中午，老闆比平時早返。

　　返黎就問：「有無收到我email？你記得寫底admin要做乜，等我唔駛再麻煩個朋友返黎再train佢！」
　　其實我成個上晝就係同呢個「朋友」（亦即容忍佢佔便宜的人）傾計，心諗：「你搵人笨咁耐，仲好意思日日聲聲話自己train人！」答：「我會有手尾既！」
　　隔左一陣問我：「你有reject xx展覽公司既sales呀？」
　　我答：「未」
　　佢話：「我咪叫左你reject佢囉！原來你未覆，唔怪得佢再打黎啦。你打去reject佢啦！」
　　我心諗：「你都夠絕囉，人地打去搵你你都唔覆，要我另外打電話去？好人你做盡，要我做丑人？」答：「你自己reject佢好D喎，你一向同佢deal開，我完全唔識佢，佢又唔識我，無端端打去怪怪地，況且我都走啦！」
　　佢黑面：「我叫你做就做啦！又唔係要你去negotiate D乜，reject佢咋嘛！」
　　我「哦」一聲，心諗：「你想做好人，但如果我打去話：＜老闆叫我reject你呀，叫我咩都唔駛同你negotiate喎＞，唔知會點呢？但咁樣逞一時之快，唔值得」所以無動作。
　　佢見我唔打電話，就話：「如果你決定左，我唔介意你早幾日走架喎！」

其實一開始，我怕唔好意思，真係有諗過賠7日錢走人，當係報答佢教左我野。但一步一步見識到佢點樣搵朋友笨，點樣蝦好人之後，我條氣越黎越唔順，何必要任由你蝦？事事順你心意？何況我呢個月就係黎學野歷練，點可以白白放棄最後最難捱既7日特訓？

　　我答：「唔好啦，我做埋D手尾，幫手報埋MPF先走嘛！」
　　佢氣絕：「如果你真係要留多幾日，我希望你真係好好地做野囉，唔好又要我做返！」
　　我語氣平靜，其實手震：「我會做足我本份既」

然後我繼續幫好cheap既佢去file佢四圍收集既「避稅單據」。用公司卡買Prada固然要報，但連幾蚊魚蛋單都唔放過…唉…我仲要未驚完，手震震貼錯晒添。

事後檢討，其實當時如果我吃驚地答：「下？原來唔駛好好做野架？」咁就真係會激死佢。但當時我太驚，而且未算太過決裂，所以諗唔到呢句對白。

又隔左一陣，忽然電話響，我口氣禮貌甜美咁聽電話，同我未辭職無分別。可能佢終於意識到我一日未走，我一日都有權趕客，所以又再表演變臉，大家平靜做野。

下晝佢有事外出，六點先返，而我當晚收八點半。因為最初佢想監視我做野，所以我倆L字型坐。既然佢不仁在先，我就故意經常回頭八下佢搞乜鬼！佢要小心唔可以再透露公司秘密我知，甚至連傾電話都有所避忌，令佢坐立不安，結果準時8:30收工，走得仲快過我。