去完名古屋

　　話說我聖誕又帶掌門去日本，今次因為買唔到機票去東京／大阪，唯有去名古屋。可惜名古屋真係乜都無，連個城都細過人，無聊到不得了。
　　最唔抵可算係跟埋掌門一齊去既兩個後生仔，老人團加入後生仔，結果兩頭唔到岸，老人家唔可以盡情悠閒，後生仔又無得去wet去玩，大家都唔盡興。
　　好彩今次食飯有驚無險，聖誕好多地方都無位，好彩被我撞到入和民。下次真係要早一兩個星期訂位先得。

　　附帶一提，有人以為我免費去日本好開心，其實我只係妹仔，如果唔stay behind就完全無得玩。莫講話陪佢地漫步公園係老餅活動，就連老人家返酒店訓晏覺我都要留係酒店廿分鐘步距附近standby，試問會有咩樂趣可言？唯一好處係練日文，否則我一定會完全唔記得，學左五年咁辛苦就會白白浪費！幸好我天生好靜且唔怕悶，同老餅都有話題，傾下計行下博物館又一日，否則俾個活潑既人去都幾難捱。