上樓cafe

　　因為被讀書會委派去找annual dinner場地，要求包場4-10pm、容納60人、每位連晚餐<$250。基本上好難搵到酒店受我地玩，我又唔想好似平時搵課室咁formal，所以就上網去搵上樓cafe包場。
　　原來旺角真係好多好多上樓cafe，唔搵都唔知，竟然可以一幢大廈層層都有咁滯。當然，要搵60人咁大個場都有少少難度，但因為有up4food呢個好似openrice咁強大既search engine，加上cafe的負責人都好熱心，所以只係用一封email，兩小時後就已經收到3間cafe候選名單: 水瓶座、Dragonese、Uno Uno。
　　水瓶座個負責人好主動，第二日放工時間就打黎問我幾時得閒上去睇下；Uno亦都隔日打黎，仲email左個menu過黎，實在係熱心做生意。因為要睇下個場，所以去左水瓶座同Dragonese；Uno位於荔枝角MTR附近，唔就腳所以未得閒去。水瓶座班主持好熱心好客，可惜露天場，室內只能容納20人；Dragonese個場唔錯，但係個主持人好cool，唔憂無生意咁款；Uno太間涉未得閒去。
　　因為去開有癮，所以呢幾日都去左幾間cafe坐。其實好多cafe既主持都非常熱心，可見生意難做。今日去左間X cafe，其中一個合伙人Zoe同我傾計，問左如果星期日包場3-10pm，90杯飲品加30份意粉都只要$3000。可惜個場只有35-40個位，如果要坐50人，就要多D人迫埋去坐榻榻米／叫佢買多塊地毡。最難搞係得一個厠所，40人一齊去，點算？所以都真係要諗清楚先決定演說試唔試下去cafe搞。